Без кафедраў і мантый. Нязмушаная размова з Лятучым

02 кастрычніка 2017

Лятучы ўніверсітэт запрашае ўсіх цікаўных на імправізаваны “Дзень адчыненых дзвярэй”. Але выступаў, прэзентацый і лекцый не будзе, замест гэтага вас чакаюць адкрытыя нефармальныя  размовы з рознымі Асобамі Лятучага за кубачкам кавы ці гарбаты.

Ужо восьмую восень Лятучы ўніверсітэт адчыняе дзверы і запрашае старых і новых сяброў да супольнай працы ў прасторы мыслення, культуры, грамадства, фармавання сябе і зменаў навокал. Адна з галоўных установак універсітэта палягае ў тым, што ідэі і думкі нараджаюцца ў дыялогу, у асяродку супольнай рэфлексіі і крытыкі, а сапраўднае навучанне мысленню магчымае толькі праз судачыненне і супрацу з Настаўнікам – інтэлектуалам, мастаком, навукоўцам, мысляром. На гэтай падставе і будуецца праца Лятучага ўніверсітэта.

10 кастрычніка Лятучы запрашае ўсіх цікаўных да адкрытай і шчырай размовы з Асобамі Лятучага ўніверсітэта. У гэты дзень не будзе выступаў, прэзентацый і лекцый, але будуць Людзі, з іх справай, якую яны робяць у Лятучым. З кожнай Асобай вы зможаце паразмаўляць сам-насам альбо ў невялічкай кампаніі іншых зацікаўленых на працягу 20 хвілін, а пасля перайсці да іншага героя. Запіс на сёлетнюю праграмму сканчаецца акурат у гэты дзень, таму гэта добрая нагода канчаткова вызначыцца са сваім асабістым шляхам у прасторы Лятучага!

Праз размовы з Асобамі Лятучага вы даведаецеся пра тое, як працуе Лятучы, пра нашу дыстанцыйную платформу і новую праграму. Нашы сябры з Жывой Бібліятэкі дапамогуць  арганізаваць прастору такім чынам, каб вы маглі паразмаўляць з усімі, хто вам цікавы, задаць пытанні пра тое, што для вас важна, паспрабаваць паразумецца з рознымі прадстаўнікамі супольнасці Лятучага ўніверсітэта.

10 кастрычніка ў Галерэі “Ў” з 18.30 да 21.00 вы зможаце сустрэцца з наступнымі Асобамі Лятучага ўніверсітэта:

Уладзімір Мацкевіч – галоўны метадолаг і антыкамуніст Беларусі;

Валянцін Акудовіч – літаратар, зачараваны мысленнем;

Алена Верашчагіна – робіць Лятучы бачным і чутным;

Ігар Бабкоў – гісторык ідэяў і філосаф “за небакраем Эўропы” ;

Зміцер Майбарада – настаўнік дыялога пра каштоўнасці;

Аліна Радачынская – аб’ядноўвае людзей, каб адкрываць дадзеныя;

Павел Баркоўскі – герменэўт, праектны актывіст і магістр гульні;

Лілія Ілюшына – верыць у гісторыю таму, што гэта абсурдна;

Вячаслаў Бабровіч –  галоўны настаўнік дэмакратыі;

Іван Вядзенін – дэвіз “Інавацыі або смерць!”;

Тацяна Вадалажская – не-сапраўдны рэктар.

Чакаем вас 10 кастрычніка ў Галерэі Ў (пр-т Незалежнасцi 37А)! Больш навінаў пра мерапрыемства і тых асобаў, з якімі магчыма будзе сустрэцца, можна знайсці ў мерапрыемстве на Фэйсбуку https://goo.gl/AZWdYL

Тэмы: