“Чуць. Бачыць. Разумець”. Імпрэза з нагоды перавыдання кнігі Міхала Анемпадыстава

26 чэрвеня 2018

12 ліпеня адбудзецца імпрэза, прысвечаная перавыданню кнігі Міхала Анемпадыстава “Колер Беларусі”. Гэты дызайнерскі альбом стаў апошняй вялікай працай выбітнага дызайнера, мастака і паэта.

Прэзентацыя кнігі “Колер Беларусі”, 30 траўня 2017 г.

Кніга не толькі адкрывае новыя веды пра колеры, але і вучыць “думаць вачыма”. “На маю думку, гэта ўсё можна чытаць невербальна. Проста разглядаць гэтыя карцінкі на ўзроўні пачуццяў і асацыяцый, упадабанняў. Ці наадварот, штосьці можа не падабацца. Гэта цікавы і патрэбны занятак, якім мы рэдка займаемся. Мы развучыліся думаць вачыма…” — распавядаў Міхал Анемпадыстаў.

Увечары 12 ліпеня  мы паспрабуем аб’яднаць словы, вобразы і музычныя імправізацыі, каб здолець убачыць, пачуць і зразумець сябе праз свет колераў, гісторыі і культуры.

У імпрэзе прымуць удзел актор Раман Падаляка, музыка Зміцер Лук’янчык і арганізатар кампаніі па выданню кнігі Таццяна Вадалажская.

“Колер Беларусі” — захапляльнае падарожжа ў Беларусь праз гісторыю і сучаснасць колераў. Гэта адна з першых спробаў прадставіць беларускую мінуўшчыну і сучаснасць праз яе колеры і адценні, прыродныя структуры, народжаныя пад уздзеяннямі трох стыхій.

Кніга ўбачыла свет дзякуючы сродкам, сабраным праз краўдфандынгавую платформу Ulej.by. На імпрэзу запрашаюцца ўсе ўдзельнікі кампаніі, каб атрымаць свае асобнікі, а таксама тыя, хто хоча пазнаёміцца з кнігай і набыць яе.

Калі: 12 ліпеня, 19:00

Дзе: Культ.цэнтр КОРПУС (пр.Машэрава, 9)

Падзея ў Фэйсбук:

 https://www.facebook.com/events/421467921667286/

ЛЯТУЧЫ ЎНІВЕРСІТЭТ — гэта некамерцыйная ініцыятыва, дзе любы жадаючы можа навучацца бясплатна.
Але гэтага ўсяго не было б без падтрымкі неабыякавых.
Напішыце каментар