Механізмы памяці. Як успаміны мяняюць нашу гісторыю і ідэнтычнасць?

02 красавіка 2018

6 красавіка ў Брэсце адбудзецца дыскусія пра тое, як праца з успамінамі мяняе нашы ўяўленні пра сябе і пра гісторыю.

Дзённікі, біяграфічныя успаміны, асабістыя аповеды займаюць усё больш месца ў нашым разуменні гісторыі сваёй краіны, супольнасці, сям’і і саміх сябе. Яны даюць новую веду пра падзеі і факты, што доўгі час адмыслова хаваліся і замоўчваліся. Яны адкрываюць знаёмыя са школы падзеі з іншага боку, калі побач з дзяржавамі, арміямі і героямі узнікае “звычайны чалавек” з ягонай праўдай і ягоным разуменнем.

Але ўспаміны – гэта не толькі новая веда. Дакументальныя спектаклі, вусная гісторыя, мастацка-дакументальная проза Святланы Алексіевіч патрабуюць перагляду сталых уяўленняў пра навуку, культуру і мастацтва. Свая і чужая памяць становіцца крыніцай для новых пытанняў і пошуку адказаў пра саміх сябе.

6 красавіка, падчас сустрэчы “Памяць: шлях ад фактаў да ідэнтычнасці” мы паспрабуем разабрацца і зразумець, як сёння адбываецца праца з успамінамі. Якім чынам – індывідуальна і супольна – мы звяртаемся да памяці? Што мы можам атрымаць новага з гэтага звароту?

Падчас сустрэчы Вольга Іванова прадставіць матэрыялы вуснагістарычных даследаванняў. На прыкладзе аднаго з аповедаў яна прапануе паразважаць пра шлях фармавання індывідуальнай ідэнтычнасці, пра механізмы памяці і расповеду.

Аксана Гайко прадставіць прыклад працы з успамінамі ў жанры дакументальнага тэатра і распавядзе пра пераасэнсаванне супольнай гарадской гісторыі і пераадоленне траўмы.

Разам з Тацянай Вадалажскай паразважаем пра развіццё сучасных тэхнічных сродкаў працы з памяццю.

6 красавіка

Брэст, Прастора КХ (вул.Халтурына 2/1)

Пачатак у 19:00

Уваход вольны!

Сустрэча адбудзецца ў межах кампаніі Лятучага ўніверсітэту ВЕДЫ  ONLINE, што арганізуе серыю дыскусійных сустрэчаў з выкладчыкамі платформы ў Брэсце, Гродна, Віцебску і Бабруйску.

Анлайн і афлайн – два бакі адукацыйнага і мысленчага працэсу. Анлайн – гэта зручнасць, дасяжнасць і новыя магчымасць. Але ёсць і іншы бок. Нішто не заменіць сустрэчы чалавека з чалавекам сам-насам у тым, каб набыць разуменне, адшукаць адказы на вострыя і складаныя пытанні.

Дыстанцыйная платформа Лятучага ўніверсітэту прапануе анлайн-курсы, каб увайсці ў тэму, засвоіць базавыя веды і зразумець, з кім са спецыялістаў ды навукоўцаў варта далей разгортваць камунікацыю, куды паглыбляцца. Сустрэчы “у жывую” – гэта магчымасць для супольнага абмеркавання праблем, асэнсавання пытанняў, крытыкі і рэфлексіі.

Удзельніцы сустрэчы:

Вольга Іванова – архівазнаўца, кандыдат гістарычных навук. Адна з распрацоўшчыкаў анлайн-праекта Беларускі архіў вуснай гісторыі, аўтараў анлайн-курсу “Прамоўленая гісторыя”.

Аксана Гайко – акторка, рэжысерка, дырэктарка тэатра “Крылы халопа”. Адна з аўтараў праекту Brest Stories Guide.

Тацяна Вадалажская – сацыёлаг, метадолаг, каардынатарка Лятучага ўніверсітэта.

 

ЛЯТУЧЫ ЎНІВЕРСІТЭТ — гэта некамерцыйная ініцыятыва, дзе любы жадаючы можа навучацца бясплатна.
Але гэтага ўсяго не было б без падтрымкі неабыякавых.
Напішыце каментар