«Сусветнае ПРЭС-ФОТА – 2018» – у Мінску

22 траўня 2018

Міжнародная выстава World Press Photo 2018, на якой можна пабачыць найлепшыя сусветныя прэс-фатаграфіі 2017 года, з 23 траўня да 12 чэрвеня  будзе працаваць у Мінску.

У 1955 годзе група галандскіх фатографаў арганізавала міжнародны конкурс «Сусветнае прэс-фота», каб паказаць свае працы аўдыторыі па ўсёй планеце. З таго часу конкурс развіўся ў найбольш прэстыжнае на свеце спаборніцтва фатографаў, а выставы конкурсу ладзяцца больш як у 100 гарадах 45 краінаў.

Фотаконкурс «Сусветнае прэс-фота – 2018» сабраў 4548 фатографаў са 125 краінаў, якія заявілі на конкурс 73 044 выявы.

Журы, у склад якога ўвайшлі аўтарытэтныя фатографы і фотарэдактары з усяго свету, адзначыла найлепшых фатографаў у васьмі намінацыях («Пільныя навіны», «Агульныя навіны», «Актуальныя тэмы», «Людзі», «Экалогія», «Прырода», «Спорт», «Працяглыя праекты»).

Тытул «Сусветнае прэс-фота – 2018» атрымала праца Ранальда Шэміта. Гэты венесуэльскі фатограф зрабіў для мексіканскай філіі «Agence France-Presse» здымак ахопленага агнём пратэстоўца падчас антыўрадавых выступаў у Каракасе 3 мая 2017 года.

Фотаздымкі, якія перамаглі ў конкурсе, як і ў папярэднія гады, утварылі міжнародную перасоўную выставу. У 2018 годзе выставу «Сусветнае прэс-фота» ўжо пяты раз прымае Беларусь (апошнія тры гады афіцыйным партнёрам праекту выступае культурніцка-адукацыйны цэнтр ЦЭХ). Сёлетняя экспазіцыя надрукаваная на шырокафарматных «Canon» і планшэтных друкарках «Arizona».

Арганізатары конкурсу вераць у моц выявы і важнасць дэманстрацыі высакаякасных візуальных гісторыяў. Іхная мэта – далучыць увесь свет да гісторыяў, якія маюць значэнне.

Экспазіцыя ў Мінску

Культ. цэнтр КОРПУС (пр-т Машэрава 9, корпус 8)

23 траўня-12 чэрвеня  

з 12:00 да 21:00

Кошт квітка – 5 рублёў, ільготны – 2,5

Для журналістаў уваход вольны!

Кантакты беларускай каманды выставы «Сусветнае прэс-фота»: events@cech.by; +375257103129

Тэмы:
ЛЯТУЧЫ ЎНІВЕРСІТЭТ — гэта некамерцыйная ініцыятыва, дзе любы жадаючы можа навучацца бясплатна.
Але гэтага ўсяго не было б без падтрымкі неабыякавых.
Напішыце каментар