Адкрыты ліст філосафаў Беларусі

14 жніўня 2020
Мы, філосафы, выкладчыкі філасофіі і выпускнікі філасофскіх факультэтаў Беларусі, разглядаем падзеі апошніх дзён не інакш як маральную і інтэлектуальную катастрофу: ані наша філасофская адукацыя, ані закарэлая звычка да інтэрпрэтацыі і знаходжання тлумачэнняў, не дазваляюць нам зразумець ці знайсці апраўданне той беспрэцэдэнтнай, нечуванай і злачыннай хвалі гвалту ў адносінах да мірных пратэстоўцаў, у якой захлынулася краіна цягам апошніх дзён. Чаму ў адносінах да беларускіх грамадзянаў, якія выйшлі на вуліцы бараніць свае галасы, былі застасаваны гумавыя кулі, светлашумавыя гранаты і іншыя спецсродкі? Чаму і навошта тысячы затрыманых катавалі ў імя хваленых «міра і стабільнасці»? Як парушэнне элементарных канстытуцыйных правоў і гвалт у адносінах да нашых суграмадзян можна апраўдваць абаронаю «канстытуцыйнага строю» Беларусі? На жаль, у нас няма адказаў. Алё ёсць патрабаванні: 
– тэрмінова спыніць хвалю гвалту, адпусціць усіх нявінных з беларускіх турмаў;

– пачаць крымінальныя справы адносна перавышэння (і проста парушэння!) сваіх паўнамоцтваў супрацоўнікамі сілавых структураў;

– пачаць дыялог з грамадскай супольнасцю Беларусі

Заклікаем беларускія ўлады і прадстаўнікоў сілавых ведамстваў пачуць нарэшце голас розуму!

Асобна хацелася б адзначыць, што выкрывальніцтвы нейкіх змоваў, замежнага умяшальніцтва, дэманізацыя пратэстуючых і падтрымка «спыненаму Майдану», якія гучаць па дзяржаўным СМІ ад імя беларускай філасофіі, да апошняй не маюць ніякіх адносінаў і не выяўляюць супольнага меркавання беларускай філасофіі як такой.