Запрашаем да вывучэння курса пра “гульню” і “чалавека гуляючага”

Лятучы запрашае да вывучэння курса “Гульня ў культуры, мысленні і практыцы” у фармаце групавых дыскусій. Прыём заявак да 17 кастрычніка.

Гэты адукацыйны фармат мы распачалі нядаўна і цяпер група, што вывучае курс пра грамадзянскую супольнасць, ужо ўпэўненна рухаецца да завяршэння.  Прапануем наступны курс, вывучэнне якога будзе ісці ў фармаце: групавога дыскусійнага саманавучання.

Курс “Гульня ў культуры, мысленні і практыцы” (У.Мацкевіч, Т.Вадалажская) прапануе разабрацца ў разнастайных падыходах да гульні і з самой сутнасцю “чалавека гуляючага” (Homo Ludens). Аўтары сцьвяржаюць, што сучаснасць і новыя выклікі звязаныя менавіта з гульнявой карцінай свету і ладам дзеяння.

Курс дазволіць пазнаеміцца з самымі рознымі стасункамі гульні з тэатрам, адукацыяй, матэматыкай ці рашэннем сацыяльных праблемаў.

Курс існуе ў відэафармаце, але мы прапануем аб’яднацца ў групу і прайсці яго супольна. Як гэта будзе адбывацца?

1. Збіраецца група 15-20 чалавек.
2. Да кожнага занятка вам трэба будзе самастойна прайсці адну тэму (паслухаць відэа і прачытаць дадатковыя матэрыялы)
3. Раз на тыдзень група збіраецца (анлайн), каб абмеркаваць засвоеныя веды, супольна разабрацца ў праблемах. Гэта адбываецца шляхам дыскусіі з мадэратарам, але без выкладчыка.
4. Прайшоўшы паступова тэму за тэмай, удзельнікі курса пішуць выніковае эсэ.
5. Эсэ абмяркоўваюцца групай з удзелам выкладчыка, аўтара курса.

Па выніках удзельнікі атрымліваюць сэртыфікаты.

Пачатак заняткаў – 21 кастрычніка.

Заняткі будуць адбывацца кожны чацьвер, а 19-ай. Курс разлічаны на 7 заняткаў.

Для таго, каб далучыцца, зарэгіструйцеся, калі ласка, да 17 кастрычніка (уключна). 

ФОРМА РЭГІСТРАЦЫІ