Семінар «Давер, адказнасць і сацыяльная згуртаванасць у сучаснай Украіне»

Міжнародная асацыяцыя гуманітарыяў (МАГ) запрашае да абмеркавання пытання даверу ў сучасных посткамуністычных грамадствах.

У траўні-чэрвені ў Кіеве і Мінску будуць арганізаваныя дыскусіі з удзелам навукоўцаў і прадстаўнікоў грамадзянскай супольнасці.

1 этап.

Навукова-практычны семінар «Давер, адказнасць і сацыяльная згуртаванасць у сучаснай Украіне: досвед і выклікі для краіны і рэгіёну».

(Арганізатары: Міжнародная асацыяцыя гуманітарыяў, Аналітычны цэнтр УКУ).

Кіеў, 24-25 траўня 2019 г.

Семінар прысвечаны абмеркаванню адной з найбольш важных праблем сучаснага ўкраінскага грамадства – недахопу інстытуцыйнага і грамадскага даверу, які ўскладняе фармаванне сацыяльнай згуртаванасці. Зварот да прыкладу Украіны стане падставай для асэнсавання крызісу даверу як характэрнай рысы постсавецкіх грамадстваў Усходняй Еўропы. Посткаланіяльны і посттаталітарных досвед усходнееўрапейскіх краін тлумачыць ідэалагічны раскол паміж “мы” /грамадствам/ і “яны” /уладай/, роўна як і складанасці з развіццём “нізавой дэмакратыі” і гарызантальнага ўзаемадзеяння. Пытанне пра давер выступае ў гэтым кантэксце як вызначальнае і патрабуе для свайго асэнсавання не толькі мультыдысцыплінарнага падыходу, але і супрацоўніцтва навукоўцаў і “практыкаў”, якія прадстаўляюць розныя сферы грамадскага жыцця. “Асваенне” дзяржавы як агента інтарэсаў супольнасці прадугледжвае пераадоленне татальнага недаверу і “па вертыкалі” (паміж грамадствам і ўладай), і “па гарызанталі” (паміж рознымі сацыяльнымі групамі). Семінар закліканы растлумачыць умовы і магчымыя шляхі аднаўлення/стварэння гарызантальнага і вертыкальнага даверу ў грамадстве.

Семінар адкрые публічная лекцыя амерыканскага філосафа і палітолага Фрэнсіса Фукуямы (Стэнфардскі ўніверсітэт), які з’яўляецца прызнаным экспертам у пазначанай тэматыцы. Пасля лекцыі адбудзецца круглы стол з удзелам вядомых украінскіх навукоўцаў і экспертаў.

Праграма другога дня семінара будзе ўключаць прэзентацыі і дыскусіі з удзелам навукоўцаў з розных краін рэгіёну, што павінна ўзмацніць крос-культурны кампаратыўны складнік у абмеркаванні заяўленых праблем. Асаблівая ўвага будзе нададзена прыцягненню маладых навукоўцаў і грамадскіх актывістаў як агентаў змяненняў і акадэміі, і грамадзянскай супольнасці ў рэгіёне. Вынікі семінара будуць падведзены на заключным круглым стале з удзелам спікераў з Беларусі і Расіі, на якім плануецца распрацаваць шэраг прапаноў практычнага характару для наступнага публічнага абмеркавання.

Да ўдзелу ў семінары запрашаюцца прадстаўнікі ўсіх сацыягуманітарных дысцыплін, якія цікавяцца названай праблематыкай. Абавязковай умовай з’яўляецца веданне англійскай мовы.

Працоўныя мовы: англійская (першы дзень), беларуская, руская, украінская.

Прыярытэт пры адборы ўдзельнікаў будзе прадстаўляцца сябрам Міжнароднай асацыяцыі гуманітарыяў. Аб самой арганізацыі і ўмовах уступлення ў яе можна даведацца па спасылцы.

Усім удзельнікам будзе забяспечана пражыванне і харчаванне на час правядзення семінара. Пры неабходнасці і пры наяўнасці дадатковага фінансавання (пытанне ўдакладняецца) арганізатары змогуць даць таксама грант на (частковае) пакрыццё дарожных выдаткаў.

Заяўка на ўдзел у семінары павінна ўключаць:

1) Аўтабіяграфію (CV),
2) Спіс публікацый за апошнія 5 гадоў,
3) Тэму і тэзісы выступу (да 300 словаў).

Тэрмін падачы заявак: да 20 красавіка 2019 г.

Заяўкі неабходна дасылаць на адрас: fenno@ucu.edu.ua (Ірына Фенно).

Пра вынікі адбору ўдзельнікаў будзе паведамлена да 1 траўня 2019.

2 этап.

Удзельнікі кіеўскага семінара, якія прадставяць найбольш цікавыя і абгрунтаваныя ідэі і прапановы, атрымаюць фінансавую падтрымку для паездкі на мерапрыемствы ў Мінску 11-12 чэрвеня 2019.

11 чэрвеня.

Публічная лекцыя вядомага палітычнага філосафа, кіраўніцы Цэнтра па вывучэнні дэмакратыі Вестмінстэрскага ўніверсітэта Шанталь Муфф на тэму «Афекты дэмакратыі» (The Affects of Democracy).

(Арганізатары: Дэпартамент сацыяльных навук ЕГУ, Мінскіа міжнародны адукацыйны цэнтр імя Ёханэса Раў, BEROC).

«У гэтай лекцыі я разгледжу найважную ролю, якую адыгрывае ў палітыцы тое, што я называю«жарсці» (“passions”), для абазначэння агульных афектаў, якія пастаўленыя на кон ў пабудове калектыўнай ідэнтычнасці. Абапіраючыся на ідэі Спінозы, Фрэйда і Вітгенштэйна, а таксама антаганістычную мадэль дэмакратыі, якую я распрацоўвала ў некалькіх сваіх тэкстах, я прааналізую прыроду нашага цяперашняга «постдэмакратычнага» стану і даследую, якія афекты неабходна мабілізаваць для стварэння калектыўнай волі, здольнай надаць новы імпульс дэмакратычным ідэалам», анансуе Шанталь Муфф.

12 чэрвеня.

Круглы стол «Давер у грамадстве і калектыўныя энергіі дэмакратычных пераўтварэнняў».

(Арганізатары: Міжнародная асацыяцыя гуманітарыяў, Лятучы ўніверсітэт).

Дыскусія, у якой прымуць удзел вядомыя беларускія навукоўцы і грамадскія дзеячы, будзе накіравана на высвятленне сувязі паміж (не)даверам у беларускім грамадстве і (не)здольнасцю грамадзян і асобных сацыяльных груп да самаарганізацыі і дзейных ініцыятываў у інтарэсах развіцця як сваіх лакальных супольнасцяў, так і краіны ў цэлым.

Удзел у круглым стале па папярэдняй рэгістрацыі.

Абвестка аб рэгістрацыі будзе апублікавана пазней.

Па дадатковых пытаннях можна звярунцца да Марыны Штрахавай па адрасе: mag@mag-iah.com.