Urbi et Orbi: Аляксандр Класкоўскі

“Некалі журналіст апрыёры быў мэтрам. Звычайныя людзі пісалі каракулі ад рукі, нават друкарская машынка была рэдкасцю, ягоныя ж радкі адліваліся ў метал на лінатыпе, ператвараліся ў чаканныя калонкі на паласе і разыходзіліся тысячамі асобнікаў чарговага газетнага нумара. Вальяжны калумніст з люлькай здаваўся жрацом таямнічага культу. Сёння вобраз журналіста дэсакралізаваны, бо кожны атрымаў магчымасць друкаваць свае тэксты прыгожымі электроннымі літарамі і выходзіць з імі на тэарэтычна бязмежную аўдыторыю Сеціва. Інтэрнэт зрабіў людзей роўнымі ў сэнсе распаўсюду сваёй творчасці, як некалі палкоўнік Кольт — у сэнсе самаабароны».

Эпоха Інтэрнэта, форума, ЖЖ, сацыяльных сетак, безумоўна, ўнесла свае карэктывы ў стаўленне да журналістаў-профі, але таксама сказалася і на палітыцы рэдакцый многіх СМІ, якасці журналісцкіх матэрыялаў. Сёння ў беларускіх СМІ вельмі рэдка можна сустрэць якасны, глыбокі, поўнавартасны матэрыял, зазвычай рэдакцыі арыентуюццца на стандартныя заметкі з гучнымі загалоўкамі, кароткія навіны, у найлепшым выпадку – інтэрв’ю на гарачай тэме. Інтэнсіўнасць развіцця навакольнага свету, усё новыя і новыя інфармацыйныя нагоды не дазваляюць журналісту мець дастаткова часу на апрацоўку матэрыялу. Так застаюцца невырашанымі і ўсё больш надзеннымі праблемы крызісу жанру, формы, тэхналогіі падачы матэрыялу, этыкі і прафесіяналізму аўтараў. Датычна беларускага палітычнага кантэксту да гэтага спісу варта дадаць яшчэ сіндром барыкады, пытанні палітычнай ангажаванасці і аб’ектыўнай ацэнкі.

З якімі праблемамі сутыкаецца сёння беларуская прафесійная журналістыка? Чаго вымагае ад журналіста напісанне якаснага матэрыялу? Як адказаць на выклікі часу? Гэтыя пытанні ў розных аспектах ставіць і аналізуе у сваіх артыкулах, блогу вядомы журналіст, аналітык, Аляксандр Класкоўскі, прафесіяналізм і досвед працы якога ў СМІ дае поўнае права выступаць у ролі медыйныага эксперта. Прышоў час паставіць гэтыя пытанні перад “Горадам і Светам”.

Лекцыя «Беларуская журналістыка: стан, праблемы, выклікі» з цыкла публічных зваротаў “Urbi  et Orbi”, якія арганізуе Лятучы ўніверсітэт, адбудзецца 21 сакавіка ў галерэі «Новы дзень» (Няміга, 36, уваход праз рэстаран NEWMAN). Пачатак а 18.30.

Уваход вольны.