20 снежня адбудзецца наступная сустрэча ўніверсітэцкага семінара, якую на гэты раз ладзіць “Школа ВКЛ”. Сустрэча прысвечана месцу і ролі гістарычнай спадчыны ў нашым жыцці і светаадчуванні і будзе праходзіць у фармаце прэзентацыі “Дыскусія пра Спадчыну”.
Як мы ставімся да спадчыны? Гэта наш хісткі падмурак ці падстава апраўдання любых нашых крокаў? Ці заўжды спадчына дапамагае нашаму развіццю? Колькі можа быць прачытанняў спадчыны?
У дыскусіі выступяць: кіраўнік Школы ВКЛ Алег Дзяровіч, слухачы Школы Аляксей Чубат і Алесь Петухоў. На семінар запрашаюцца ўсе чальцы калегіюма Лятучага, слухачы ўсіх школ, а таксама актыўныя ўдзельнікі ўніверсітэцкай супольнасці, зацікаўленыя ў развіцці ўніверсітэта.
Семінар адбудзецца 20 снежня (аўторак) на Падворку (вул.Баграціёна, 39).
Пачатак а 18.30.
Універсітэцкі семінар: сезон 2016-2017. У мінулым годзе мы адкрылі другі ўзровень навучання ў Лятучым універсітэце – Школы магістраў гульні. Кожная з іх накіравана на супольную інтэлектуальную працу невялікіх групаў у шчыльнай камунікацыі з Настаўнікамі – беларускімі мыслярамі і інтэлектуаламі. Кожная з іх разгортвае сваю “гульню”, свой асабісты спосаб пабудовы мыслення і дзеяння, стварэння культуры і свету.
Кожная з школаў паступова выпрацавала свой стыль, утварыла супольнасць і распачала ўнутраныя інтэлектуальныя працэсы. У гэтым годзе мы вырашылі, што зараз самы час сустрэцца на агульным полі гульні.
Што кожная школа можа прапанаваць у якасці інтэлектуальнага выкліка? Як прапануе арганізаваць супольнае мысленне?
Сёлетні ўніверсітэцкі семінар пераўтвараецца ў прастору сустрэчы школаў: прэзентацыі, каммунікацыі і супольнага мыслення.