Першы беларускі фестываль інтэлектуальнай кнігі “ПРАДМОВА”

24 красавіка 2018

Фестываль інтэлектуальнай кнігі “Прадмова” – гэта крытычны агляд зробленага на беларускім кніжным рынку за апошнія гады і спроба адшукаць адказы на пытанні: куды мы мусім рушыць далей?

Ці мае будучыню беларуская інтэлектуальная кніга? У якіх традыцыях і варунках мы знаходзім сябе зараз?

27-31 траўня 2018 года

Ok16, вул. Кастрычніцкая, 16

Фестываль – гэта пляцоўка для інтэнсіўнай камунікацыі паміж усімі ўдзельнікамі кнігавыдавецкага працэсу: выдаўцамі і аўтарамі, рэдактарамі і крытыкамі, ілюстратарамі і дызайнерамі, перакладчыкамі і, – безумоўна! – чытачамі, зацікаўленымі ў сучаснай і якаснай беларускай інтэлектуальнай кнізе.

Адметнай часткай Фестывалю стане ВЫСТАВА-ПРОДАЖ наробку беларускіх выдавецтваў за апошнія гады ў галіне інтэлектуальнай літаратуры і літаратуры non-fiction (інтэлектуальная проза, эсэістыка, філасофская і грамадская веда, навукова-папулярная літаратура, пераклады беларускіх аўтараў ці выдадзеныя на беларускай мове пераклады замежных аўтараў).

На выставе вы зможаце ўбачыць прадукцыю выдавецтваў: ARCHE, “Галіяфы”, “Зміцер Колас”, “Кнігазбор”, “Лимариус”, “Логвінаў”, “Тэхналогія”, “Экономпресс”, “Янушкевіч” і інш.

Падчас фестывалю адбудуцца дыскусіі і круглыя сталы, майстар-класы і прэзентацыі новых кніг беларускіх выдавецтваў, мастацкія чытанні і выступы-перформансы актораў, сустрэчы з цікавымі асобамі, пераможцамі і сябрамі журы літаратурных прэмій, і шмат якія іншыя літаратурныя і калялітаратурныя імпрэзы, прысвечаныя беларускай інтэлектуальнай кнізе. Асобна варта адзначыць Дзіцячы фармат: шэраг забаўляльных мерапрыемстваў і прэзентацый для дзяцей і дыскусіі-абмеркаванні для іх бацькоў, датычныя будучыні беларускай дзіцячай кнігі.

Сярод удзельнікаў фестывалю: В. Акудовіч, У. Арлоў, А. Бахарэвіч, Л. Баршчэўскі, С. Дубавец, І. Дубянецкая, П. Касцюкевіч, М. Мартысевіч, У. Мацкевіч, Б. Пятровіч, А. Упала, А. Хадановіч, Ю. Цімафеева, В. Шпарага і многія інш.

Нам важна зрабіць фестываль агульнай пляцоўкай для камунікацыі і сустрэч, таму:

Калі вы прадстаўнік выдавецтва альбо арганізацыі, датычнай да кніжнай справы, і жадаеце прыняць удзел у фармаце выставы-продажу з уласным стэндам і інфармацыяй пра вашу дзейнасць ці прадукцыю – рэгіструйцеся па спасылцы.

Калі вы маеце цікавыя ідэі мерапрыемстваў для фестывальнай праграмы – персанальна ці ад імя вашай арганізацыі – мы таксама запрашаем вас да ўдзелу! Для рэгістрацыі заяўкі на мерапрыемства ў межах Фестываля запоўніце адмысловую форму.

Заяўкі на ўдзел у Фестывалі і выставе прымаюцца да 14 траўня.

Найбольш цікавыя і важныя з заяўленых мерапрыемстваў стануць часткай праграмы Першага беларускага фестывалю інтэлектуальнай кнігі «Прадмова».

Уваход для гасцей – вольны!

***

Арганізатар фестывалю: Установа культуры «Кніжны офіс».

Партнёры фестывалю: «ОК16», Symbal.by,«Арт-Сядзіба», РГА «Беларускі ПЭН-цэнтр», «БФП – беларуская філасофская прастора», КГК «Будзьма беларусамі!»,«Лятучы ўніверсітэт», ГА «Саюз беларускіх пісьменнікаў» і інш.

Шукайце інфармацыю пра Фестываль у Facebook і Vkontakte.

Па дадатковых пытаннях можна звяртацца: +375297738443 (Павал), +375445424342 (Аляксандра).

ЛЯТУЧЫ ЎНІВЕРСІТЭТ — гэта некамерцыйная ініцыятыва, дзе любы жадаючы можа навучацца бясплатна.
Але гэтага ўсяго не было б без падтрымкі неабыякавых.
Напішыце каментар